ఆదాయపు పన్ను కొత్త రూల్స్.. వేతన జీవులకు భారీ ఊరట, కఠిన నిబంధనలు!

దేశంలో ఆదాయపు పన్ను విధానంలో చారిత్రాత్మక మార్పులకు కేంద్ర ప్రభుత్వం శ్రీకారం చుట్టింది. దాదాపు 65 ఏళ్లుగా అమల్లో ఉన్న 1961 నాటి ఆదాయపు పన్ను చట్టం స్థానంలో కొత్త ఆదాయపు పన్ను చట్టం-2025ను తీసుకువచ్చింది. దీని అమలుకు అవసరమైన "ఆదాయపు పన్ను నిబంధనలు-2026"ను కేంద్ర ప్రత్యక్ష పన్నుల బోర్డు (సీబీడీటీ) మార్చి 20న నోటిఫై చేసింది. ఈ కొత్త చట్టం, నిబంధనలు ఏప్రిల్ 1, 2026 నుంచి దేశవ్యాప్తంగా అమల్లోకి రానున్నాయి. ఈ మార్పుల ద్వారా పన్ను విధానాన్ని సరళతరం చేయడంతో పాటు, పన్ను చెల్లింపుదారులకు, ముఖ్యంగా వేతన జీవులకు కొన్ని కీలక ప్రయోజనాలు కల్పించారు.

పాత విధానం ఎంచుకుంటే ప్రయోజనాలు
ఈ కొత్త నిబంధనల ప్రకారం, పన్ను చెల్లింపుదారులు ఇప్పటికీ పాత, కొత్త పన్ను విధానాల మధ్య ఎంచుకునే స్వేచ్ఛను కలిగి ఉంటారు. అయితే పాత పన్ను విధానాన్ని ఎంచుకునే వేతన జీవులకు ఈ మార్పులు పెద్ద ఊరటను అందిస్తున్నాయి.

HRA మినహాయింపు విస్తరణ
ఇప్పటివరకు ముంబై, ఢిల్లీ, కోల్‌కతా, చెన్నై నగరాల్లో మాత్రమే ఉన్న 50% ఇంటి అద్దె అలవెన్స్ (HRA) మినహాయింపు పరిధిని ఇప్పుడు హైదరాబాద్, బెంగళూరు, పుణె, అహ్మదాబాద్ నగరాలకు కూడా విస్తరించారు. ఈ 8 నగరాల్లోని ఉద్యోగులు తమ జీతంలో 50% వరకు HRA కింద పన్ను మినహాయింపు పొందవచ్చు. ఇతర ప్రాంతాల్లో ఇది 40%గా కొనసాగుతుంది.

భారీగా పెరిగిన అలవెన్సులు
పిల్లల చదువుల కోసం ఇచ్చే ఎడ్యుకేషన్ అలవెన్స్‌ను నెలకు రూ.100 నుంచి రూ.3,000కు (ఇద్దరు పిల్లల వరకు) పెంచారు. అదేవిధంగా, హాస్టల్ ఖర్చుల అలవెన్స్‌ను నెలకు రూ.300 నుంచి ఏకంగా రూ.9,000కు (ఇద్దరు పిల్లల వరకు) పెంచడం గమనార్హం.

సరళతరం.. కఠినతరం
పన్ను విధానాన్ని సులభతరం చేయడమే లక్ష్యంగా కొత్త చట్టాన్ని రూపొందించారు. ఇందులో భాగంగా సెక్షన్ల సంఖ్యను 819 నుంచి 536కు, చాప్టర్లను 47 నుంచి 23కు తగ్గించారు. పన్ను చెల్లింపుదారులకు గందరగోళం కలిగించే "ప్రీవియస్ ఇయర్", "అసెస్మెంట్ ఇయర్" అనే పదాలను తొలగించి, వాటి స్థానంలో ఒకే "టాక్స్ ఇయర్" అనే భావనను ప్రవేశపెట్టారు.

అయితే, ప్రయోజనాలతో పాటు నిబంధనలను కూడా కఠినతరం చేశారు. HRA క్లెయిమ్ చేయాలంటే ఇకపై ఇంటి యజమాని-అద్దెదారు సంబంధాన్ని తప్పనిసరిగా ప్రకటించాలి. అలాగే, డిజిటల్ ఆర్థిక వ్యవస్థపై దృష్టి సారించి, రూ.2 కోట్లకు మించి లావాదేవీలు జరిపే లేదా 3 లక్షల మందికి పైగా వినియోగదారులతో సంబంధాలున్న విదేశీ సంస్థలను పన్ను పరిధిలోకి తెచ్చేందుకు "సిగ్నిఫికెంట్ ఎకనామిక్ ప్రెజెన్స్" (SEP) నిబంధనలను స్పష్టం చేశారు.

కొత్త చట్టం కింద 150కి పైగా కొత్త ఫారాలను కూడా నోటిఫై చేశారు. ముఖ్యంగా, ఉద్యోగులకు ఇచ్చే ఫారం 16 స్థానంలో ఇకపై ఫారం 130 రానుంది. ఏప్రిల్ 1 నుంచి ఈ సమూల మార్పులు అమల్లోకి రానుండటంతో పన్ను చెల్లింపుదారులు, నిపుణులు కొత్త నిబంధనలపై అవగాహన పెంచుకోవాల్సి ఉంటుంది.